Act 18 | APZ | STEP | Osohonta Poul Atenɨs ulɨko'manto ango Koulinne'no umentisofoho.

Acts 18

Ango Koulin sopo Poul syoho imentisofoho.

1 Osohonta Poul Atenɨs ulɨko'manto ango Koulinne'no umentisofoho. 2 Osopo nohumanto hwe Juta fihwo nohumentanɨngki uhwonɨmentisofoho. Oso hwe huhwo sohwo kakoe yofe Akwila. Kakoe ango hwapɨngo neso Pountos. Hohonta kako kakoe ape Pɨlisila'nji hwaho Itali ulɨko'manji pmmentisiyefoho. Hwapɨngoso hwe yofe engo'njo Kɨloutiyos kako a'amu Juta Loum humamotofo somo wae yaofahonɨngki hofɨko ango kengo kengopono humpo'mentohofofoho. Oso a'mu siya'umo Poul jomo u'ma'mentisofoho. 3 Poulɨ'nji oso a'mu siya'u'nji hofɨkoe syohoso afafoho. Hwapɨfe ango molɨmotofofoho. Osopo Poul siko'nji nohumantɨfi syoho imentohofofoho. 4 Engolopohamo sɨkuno iyoho humayo somo Poul a'amu Jutafe tajo ango somo swonto hofɨko'nji hungkuno lɨmotofofoho. Poul kako a'amu Juta'nji Ngkɨlikɨ'nji Jisasɨmo sɨmeho hi'ntnnono uyɨfitnne'ento lutɨhwamentisofoho.

5 Hwangku sohonta Sailasɨ'nji Timouti'nji hwaho Masetouniya ulɨko'manji Poul ango Koulin humentanɨngki pmmentisiyefoho. Siko nopahonɨngki Poul hwapɨfe ango syoho ulɨko'manto Anɨtuye hungkuno a'amumo lutɨhwamentisofoho. Ole ulɨmento, Hwe Anɨtu nakwoe hwahopo uhwatɨmentiso sohwo Jisas Kɨlaisɨyoho. Ose ulɨmentisofoho. 6 Olo hungkuno hilo so'no a'amu Juta fehohnjoso nakwolaho lontɨfi hofɨko Poulɨmo sitofo ulɨmentohofofoho. Oso'no Poul kakoe hwapɨfemjo hintalinyo wae loho'nɨmentisoso kakoe hungkunomo haloho maposo'nefoho. Ose yonto ulɨmento, Sekwo tɨkanomo ufijo'manji sekwoe syohofoho. Nje syoho moi'wonoho. Sekwo a'amu Juta sokumo selɨko'mahm'mo a'amu temtitofo kengo somo Anɨtuye hungkuno wolutɨhwamne'no yohono. 7 Ose ulonto tajo ango somo nulɨko'manto hwe nom'ne temtitofo kengo sohwoe ango somno nowento osopo nohumanto lutɨhwamojofoho. Oso hwe huhwo sohwo kako Anɨtune'no jomo ulɨwo'nɨngkiso hweho. Kakoe yofe Taitas Josɨtos. Kakoe ango tajo ango'njo sopo afapo molinyofoho. 8 Oso tajo ango mokosyohumayo sohwoe yofe Kɨlisɨposɨyoho. Kako kakoe ape'nji sikoe mehomi'nji hofɨko Jisasɨmo sɨmeho hi'ntnnono uyɨmentohofofoho. A'amu Koulin pi'nɨngoso Poulɨye hungkuno nupa'nontɨfi sɨmeho hi'ntnnono uyahonɨngkofi mijo kiyoma'mentohofofoho.

9 Sɨkuno nom'nemo wojo hopa uhwonɨmentisoso Anɨtu ulɨmento, Kɨko iyoho yohotoho. Kɨko nje hungkuno yoloho fiso. Kɨko mampi'nyo humahotoho. 10 Ngko kɨko'nji humaleno. A'amu nom'neso wonyo makumokufitnnehofo. Oso ango lopo nje a'amu ne pi'nɨngo imo'nɨfitnnefoho. Ose ulɨmentisofoho. 11 Oso'no Poul oso ango sopo soswo anga'no uyokolofahonɨngki osopo nohumanto Anɨtuye hungkuno lutɨhwamojofoho.

12 Hwe fihwo kakoe yofe Ngkaliyou, Loum mta'ango sohwo yofe engo nomanto hwaho Ngkɨlik mokosyohumayo sohonta a'amu Jutaso sɨmeho afa inontɨfi Poulɨmo nakwolaho lontɨfi, hungkuno ujo'ne ango Ngkaliyou hungkuno ito'no mɨhwajiyo'ne sopono ipemotasɨmentohofofoho. 13 Ole ulɨmentohofi, Olo hwe lohwo kako Anɨtune'no tɨfi inɨngkayo so'no honɨngkano songo lonetɨhwalofoho. Olo honɨngkano songo losomo tɨfi inɨngkowaso'manji hungkuno hohontajo somo womtɨhupeentanoho. 14 Ose ulahonɨngkofi Poul hungkuno ulɨmonto yahonɨngki Ngkaliyou kako a'amu Juta somo ulɨmento, Olo hwe lohwo hungkuno Loumnta'angomo hwotoho hmmaso'manji ngko sekwoe hungkuno upa'nɨ'mnesohilo. 15 I oso'no olo hiloso sekwoe honɨngkano hungkuno hohontajo mta'ango so'no sekwo'nohini mtitopmno. Nje syoho'maho. Sekwoe syohofoho. 16 Ose ulonto ango mta'ni lɨhwatɨmentisofoho. 17 Oso'no a'amu Juta hiso hwe fihwo kakoe yofe Sousɨtenis tajo ango mokosyohumayo sohumo aho nokentɨfi ango hungkuno ito'no mɨhwajiyo sopo ikujoho fongku'mentohofofoho. Ose ko yahonɨngkofi Ngkaliyou kako hungkuno nom'ne mujofoho.

Hwaho Siliya ango Antiyouk sopono Poul asomo umentisofoho.

18 Poul ango Koulin sopo a'amu Jisasɨmo inɨngkamotofo so'nji nohumentanɨngki sɨkuno nom'ne nuyokolofahonɨngki Poul oso a'amu somo ulɨko'ma'mentisofoho. Kako Pɨlisila'nji Akwila'nji siko'ya'u'nji nowentɨfi ango Sengkɨliya sopo Poul kako Anɨtumo hungkuno nto ulɨmentiso so'no kakoe mijiyo hohwafo imokinɨmentisofoho. Hohwafo imokinɨngkahonɨngki yofayokinomo nokotasontɨfi hwaho Siliyamne'no wako'mentohofofoho. 19 Hofɨko ango Efesos i'mofawentɨfi Poul a'mu siya'umo nulɨko'manto a'amu Jutafe ango uhu'mokiyo somo noswonto hofɨko'nji hungkuno lɨmentohofofoho. 20 Hofɨko Poulɨmo ulɨmentohofi, Kɨko nakwo'nji sɨkuno pi'nɨngo fohumaho. Ose ulahonɨngkofi oso hungkuno somo tɨfi minɨngkammentisofoho. 21 O'o kako wamonto yonto ulɨmento Anɨtu ngkimo ole ntoso'manji, Kɨko ango Efesos asomo fɨwe ntososo, e'wa ngko wapmmonnoho. Ose ulonto Efesos ulɨko'manto yofayokinomo umentisofoho. 22 Yofayokino Sisaliya ifohohosyosyahonɨngki Poul a'amu Jisasɨmo inɨngkamotofo osopo humamotofo somo u'manto hungkuno we'e ulonto Antiyoukɨmne'no umentisofoho.

Apoulous ango Efesos sopo Anɨtuye hungkuno ulɨmentisofoho.

23 Osopo nohumanto sɨkuno nom'ne somo umentisofoho. Kako hwaho Ngkolesiya'nji Fɨlijiya'nji uhwontawento a'amu Jisasɨmo inɨngkamotofo somo yokumpohn'nyo sosofito fosyohumamentisofoho.

24 A'amu Juta fihwo kakoe yofe Apoulousɨyoho. Oso hwe huhwo sohwoe ango hwapɨngoso Alekɨsantɨliyanoho. Kako ango Efesos sopo noponto humamentisofoho. Oso hwe huhwo sohwo Anɨtuye iyoswo somo huno'njo hweho. Kako Anɨtune'no hungkuno wonyoangkafo lɨwo'nɨngkiso hweho. 25 A'amu nom'neso kakimo Anɨtuye honɨngkanomne'no lutɨhwahonɨngkofi kako haloho'no yonto sɨmeho wopɨngo umo'nɨngkahonɨngki nom'ne a'amu somo Jisasɨmne'no yoloho lutɨhwamentisofoho. I oso'no Jisasɨye hungkuno fehohnjo kako huno muyofoho. O'o, Joun a'amumo mijo kiyomayo yahino so'no huno unyo hweho. 26 Kako a'amu Juta sofe ango uhu'mokiyo sopo olo hungkuno hiloso a'amu somo yokumpohn'nyo lutɨhwoma'mentisofoho. Pɨlisila'nji Akwila'nji siko olo hungkuno hiloso nupa'nonji hwe sohumo nutɨmanji sikoe angomno ipemotawenji osopo Jisasɨmne'no hungkuno hopi'nonohino lutɨhwamentisiyefoho. 27 Hwangku sohonta Apoulous hwaho Ngkɨlik sopone'no wamo lonto, a'amu Jisasɨmo inɨngkamotofo Efesos humamotofoso Apoulousɨmo ufo'mano lontɨfi hofɨkoe a'amu hwaho Ngkɨlik osopo humamotofo somne'no iyoswo mtɨ'mokumentohofofoho. Ole mtɨ'mokumentohofi, Olo hwe lohumo nakwoe a'amu hwosoho ulɨmno. Ose mtɨ'mokumentohofofoho. A'amu Ngkɨlik somne'no Anɨtu hitoho ulofahonɨngki honɨngkano imo'mentisoso a'amu anga'no anga'no Jisasɨmo sɨmeho hi'ntnnono umotofofoho. Oso a'amu homo somo Apoulous nu'manto ufo'ma'mentisofoho. 28 Osopo Apoulousɨ'nji a'amu Juta Jisasɨmo minɨngkayo'njo so'nji utɨhwa'nyopo Jisasɨmne'no hungkuno hnnɨmentohofofoho. Apoulous kakoe huno hofɨkimo yakolo uloho'mentisofoho. Kako Anɨtuye iyoswo mta'ango utɨhwanto ole lutɨhwamento, Oso hwe Anɨtu nakwoe hwahopo uhwatɨmentiso sohwo Jisas Kɨlaisɨyoho. Ose lutɨhwahonɨngki hofɨkoe sɨmehomo'mo nehopeho syafɨhu'mentohofofoho.